በኢትዮጵያ የሰውነት አካል ንቅለ-ተከላ ማዕከል ለማቋቋም የሚስችል ፕሮጀክት ይፋ ሆነ

በኢትዮጵያ የሰውነት አካል ንቅለ-ተከላ ማዕከል ለማቋቋም የሚስችል ውይይት በኢትዮጵያ የቱርክ አምባሳደር በርክ ባራን
ከተመራ ልዑክ ጋር ተደረገ። የሰውነት አካል ንቅለ-ተከላ ማዕከል በቅዱስ ጳውሎስ ሆስፒታል ለማቋቋም የሚስችል ፕሮጀክት ፕሮፖሳል አቅርቧል፡፡

ፕሮጀክቱ በተርኪሽ ትራንስፕላንት ፋውንዴሽ፣ ተርኪሽ ኮኦፖሬሽን ኤጀንሲና ኢተርናሽናል ትራንስፕላንት ኔትወርክ ድጋፍ ይተገበራል። በኢትዮጵያ የሚሰጠውን የህዋስ፣ ህብረህዋስና የሰውነት አካል ንቅለ-ተከላ አገልግሎትን ለማስፋፋት ይረዳል፡፡

በቅርቡ በተወካዮች ምክርቤት የጸደቀው የጤና አዋጅ የሰውነት አካል ንቅለ-ተከላን ያካተተ መሆኑን ያስታወሱት የጤና ሚኒስትር ዶ/ር መቅደስ ዳባ፤ በሃገራችን የሰውነት አካል ንቅለ-ተከላ አገልግሎት አሁንም ያልተሟላ ፍላጎት መኖሩን ተናግረዋል፡፡ አገልግሎቱን ለማስፋት የህዋስ፣ ህብረ-ህዋስ እና የሰውነት አካል ንቅለ-ተከላ አገልግሎት አሰጣጥ ረቂቅ መመሪያ መዘጋጀቱንም አከለዋል፡፡

የልኡካን ቡድኑ ያቀረበው ፕሮጀክት ዕቅድ በሃገራችን እየተሰጠ የሚገኘውን የህብረ-ህዋስ እና የሰውነት አካል ንቅለ-ተከላ አገልግሎትን እንደሚያሳድግ የተናገሩት ደግሞ የደምና ህብረ-ህዋስ ባንክ ዋና ዳይሬክተር ዶ/ር አሸናፊ ታዘበው ሲሆኑ፤ የቀረበው የፕሮጀክት ዕቅድ ከደም እና ህብረ-ህዋስ ባንክ እቅድ ጋር የተጣጣመ መሆን እንዳለበት ተናገረዋል፡፡

ፕሮጀክቱ ብሄራዊ ሰውነት የአካል ንቅለ-ተከላ ማስተባበሪያ ማእከልን ማቋቋም፣ የአካል ንቅለ-ተከላ ማዕከል በቅዱስ ጳውሎስ ሆስፒታል መመስረት፣ የሰውነት አካል-ንቅለ ተከላ ሲሙሌሽን ማሰልጠኛ ማቋቋምና የባለሙያዎች ስልጠናን ያካተተ ነው፡፡

በኢትዮጵያ የአካል ክፍሎች ንቅለ ተከላ ማዕከል ለማቋቋም የቀረበው የፕሮጀክት ሀሳብ አስፈላጊነት ጥልቅ ነው፤ ይህም በሀገሪቱ ያለውን ያልተሟላ የሰውነት አካል ንቅለ ተከላ አገልግሎት ፍላጎት ለመፍታት ያለመ ነው፡፡

ፕሮጀክቱ የሴል፣ የቲሹና የሰውነት አካል ንቅለ-ተከላ ተደራሽነትን በማስፋት ህይወትን የመታደግ፣ የጤና ውጤቶችን የማሻሻል እና ዘላቂ የሰውነት ንቅለ-ተከላ አገልግሎትን በኢትዮጵያ የመገንባት አቅም ይፈጥራል። ለሀገሪቱ አጠቃላይ የጤና አጠባበቅ ስርዓት መሻሻል አስተዋጽኦ ያደርጋል።

የጤና ሚኒስትር ዶ/ር መቅደስ ዳባ ከኢትዮጵያ የቱርክ አምባሳደር በርክ ባራን ጋር የፕሮጀክቱን ፋይናንስ ምንጭ፤ ሁለቱ ሃገሮች በጤናው ዘርፍ ያላቸውን ግንኙነት ይበልጥ በሚያጠናክሩበት ላይ መወያየታቸውን የጤና ሚኒስቴር መረጃ ጠቅሶ ኢፕድ ዘግቧል።