ከህወሓት ጉባኤ ራሳቸው ያገለሉ አካላት ወደ መድረኩ እንዲመለሱ የህወሓት ጉባኤ ጥሪ አቀረበ። የህወሓት ጉባኤ ቃልአቀባይ አቶ አማኑኤል አሰፋ ዛሬ አራተኛ ቀኑ በያዘው ጉባኤ ላይ በሰጡት መግለጫ ራሳቸውን ከጉባኤ ያገለሉ አካላት ሐሳባቸው እንዲገልፁ ጥሪ እንዲደረግላቸው መወሰኑን ተናግረዋል። ይህ በእንዲህ እንዳለ በትግራይ የሚንቀሳቀሱ ተቃዋሚ ፓርቲዎች፥ በፌደራሉ መንግስት በኩል ህወሓት እና የትግራይ ህዝብ አንድ አድርጎ የመመልከት እንዲሁም በህወሓት ምክንያት ትግራይን የመጉዳት አባዜ መቀጠሉ እንዳሳሳባቸው አስታውቀዋል።
ከተጀመረ አራተኛ ቀኑ በያዘው የህወሓት 14ተኛ ጉባኤ ዙርያ ዛሬ ማብራርያ የሰጡት፥ የጉባኤው ቃል አቀባይ ተደርገው የተሾሙት አቶ አማኑኤል አሰፋ፥ የፓርቲው ጉባኤ እስካሁን በተለያዩ አጀንዳዎች ዙርያ መወያየቱን እና ውሳኔዎች ማስተላለፉን አስታውቀዋል። በጉባኤው ውስጥ ጉባኤው እንዲራዘም የተነሳ አጀንዳ እንደነበረ የገለፁት ቃልአቀባዩ፥ ይህ ሐሳብ በተለያዩ ምክንያቶች ተቀባይነት አለማግኘቱን ተናግረዋል። በጉባኤው መሳተፍ ይገባቸው የነበረ በተለይም ከደቡብ እና ደቡብ ምስራቅ ዞን የተወከሉ የፓርቲው አባላት ወደጉባኤው እንዳይመጡ፣ እንዳይሳተፉ፥ በአስተዳደር አካላት ዓፈና መፈፀሙን የገለፁት ቃልአቀባዩ አቶ አማኑኤል፥ ከነዚህ አካባቢዎች በታዛቢነት ለመሳተፍ የመጡ ተሳታፊዎች የተፈጠረውን ክፍተት ለሞምላት በድምፅ እንዲሳተፉ ጉባኤው መወሰኑን አንስተዋል። ከዚህ በተጨማሪ ቃልአቀባዩ፥ በራሳቸው ፍቃድ ከጉባኤው ውጭ የሆኑ አካላት ወደመድረኩ እንዲመለሱ ጥሪ እንዲደረግ መወሰኑም ገልፀዋል።
በጉባኤው ማጠናቀቅያ አዲስ የህወሓት አመራር ሊመረጥ እንደሚጠበቅ ተነግሯል። ይህ በእንዲህ እንዳለ በወቅታዊ ጉዳዮች ዙርያ ዛሬ በመቐለ የጋራ ጋዜጣዊ መግለጫ የሰጡት የትግራይ ነፃነት ፓርቲ፣ የታላቋ ትግራይ ብሔራዊ ሸንጎ ባይቶና እንዲሁም ሳልሳይ ወያነ ትግራይ በበኩላቸው ወቅታዊ የህወሓት ፖለቲካዊ እንቅስቃሴ እና የፌደራል መንግስትና የተቋማቱ ምላሽ የትግራይ ህዝቡን ለስጋት የዳረገ ሲሉ ገልፀውታል። የትግራይ ነፃነት ፓርቲ ሊቀመንበር ዶክተር ደጀን መዝገበ በኢትዮጵያ መንግስት በኩል ፓርቲና ህዝብ አለመለየት፣ በህወሓት እርምጃ የትግራይ ህዝብን ለመቅጣት የመሞከር አዝማሚያ እየታየ መቀጠሉን አንስተዋል።
ሌላው ሐሳባቸውን የገለፁት የሳልሳይ ወያነ ትግራይ ሊቀመንበር አቶ አሉላ ሃይሉ በበኩላቸው፥ የኢትዮጵያ መንግስት እና ዓለምአቀፍ ተቋማት ጨምሮ ሌሎች ብቸኛ የትግራይ ፖለቲካዊ ተወካይ ህወሓት ብቻ አድርጎ መመልከት ለበርካታ ችግሮች መነሻ እየሆነ እንዳለ ገልፀው ይህ እንዲታረም ጥሪ አቅርበዋል።
ሶስቱ ተቃዋሚ የፖለቲካ ፓርቲዎች በፕሪቶርያው ስምምነት እንደተጠቀሰው በትግራይ ሁሉም ሐይል አካታች አስተዳደር ሊመሰት ይገባል ብለዋል።
ለተፈጠረው ፖለቲካዊ አለመረጋጋት የፓለቲካ ሃይሎችን ያቀፈ መንግስት በአስቸኳይ መመስረት ያስፈጋል ተባለ
” ለቡድናዊ ጥቅም ሲባል በህዝብ ቁማር መጫወት መቆም አለበት ” ሶስቱ ፓርቲዎች
በትግራይ የሚንቀሳቀሱት ባይቶና፣ ሳወት እና ናፅነት የፓለቲካ ፓርቲዎች በጋራ በሰጡት መግለጫ ፤ ” በህወሓት አመራሮች መካከል የተፈጠረው ህገ-ወጥ እንቃስቃሴና ፍጥጫ ተው መባል ይገባዋል ” ብለዋል።
በህወሓት አመራሮች የተፈጠረው ውጥረትን ተከትሎ በህዝቡ የሚታየውን መረበሽ ያወገዙት ሦስቱ ተፎካካሪ ፓርቲዎች ” ህግ እየጣሱ በህዝብ ካባ ስም ለመደበቅ የሚደረገውን እንቅስቃሴ እናወግዛለን ” ሲሉ ገልጸዋል።
” ለቡድናዊ ጥቅም ሲባል በህዝብ ቁማር መጫወት መቆም አለበት ” ያሉት ፓርቲዎቹ ደርጅታዊ ይሁን ቡድናዊ ጉዳይ ከህዝብ ህልውና ጋር ማገናኘትን እንፀየፈዋለን እንዲቆምም እናሳስባለን ነው ያሉት።
ፓርቲዎቹ መሰል የህዝብ ሰላም፣ ህልውናና ደህንነት አደጋ ላይ የሚጥል ፣ ህገ-ወጥ ፓለቲካዊ ተግባር ሲታይ የሚመለከተው የፀጥታ አካልና ህዝብ ፍትሀዊ በሆነ መንገድ በአስቸኳይ የማስቆም ሃላፍነቱን መወጣት አለበት ብለዋል።
ፓርቲዎቹ አክለውም የተፈጠረው ፓለቲካዊ አለመረጋጋት ዋነኛ መፍትሄው ሁሉም የፓለቲካ ሃይሎች በእኩልነት የሚሳተፉበት መንግስት በአስቸኳይ መመስረት ነው ብለዋል።